कृष्ण ढकाल
बर्दघाट,चैत्र–७
शुक्रवार देखि परेको पानीका कारण बुटवल–नारायणगढ सडक खण्डको दाउन्ने सडक चिप्लो भएपछि मालवाहक सवारी साधनमा रोक लगाइएको छ । नारायणगढ– बुटवल सडक अयोजना (पश्चिम खण्ड) ले सूचना निकालेर चैत ८ गते आइतबारसम्म मालवाहक सवारी साधनमा रोक लगाएको हो ।
मालवाहक सवारी साधनहरु चिप्लोका कारण सडकमै फस्ने र ओभरलोडले थप समस्या निम्ताएको भन्दै रोक लगाइएको हो । सडक हिलाम्मे हुँदा चिप्लोका कारण सवारी साधन चल्न सकेका छैनन । बेलुका ७ बजेदेखि बिहान ५ बजेसम्मका लागि मालवाहक सवारी साधनमा रोक लगाइएको छ ।
सबैभन्दा बढी दाउन्नेको क्याप्टेन डाँडाँ र ६४ मोडको सडक बिग्रिँदा सवारी सञ्चालन हुन कठिनाई भएको जिल्ला प्रहरी कार्यालय पूर्वी नवलपरासीले जनाएको छ । सडक अवरोध भएपछि पूर्व पश्चिम जाने मालवाहक सवारी साधनहरु बर्दघाटको टिसिएन चोक र दुम्किवासमा रोकिएको प्रहरीले जनाएको छ ।
