नवलपरासी , भाद्र–११
मोहन बैद्य ‘किरण’ नेतृत्वको क्रान्तिकारी कम्युनिस्ट पार्टी नेपाल जिल्ला समिति नवलपरासीले विहीवार जिल्ला प्रशासन कार्यालय नवलपरासी (बसुप)का प्रमुख जिल्ला अधिकारी हिरालाल रेग्मी मार्फत प्रधानमन्त्रीलाई ११ बुँदे ज्ञापन पत्र बुझाएको छ ।
पार्टीको केन्द्रीय सदस्य तथा जिल्ला ईन्चार्ज क्षेत्र बहादुर थापाको नेतृत्वमा जिल्ला प्रशासन कार्यालय परासी पुगेको बैकल्पिक केन्द्रीय सदस्य एवं जिल्ला सेक्रेटरी रवि पाण्डेय सहितको टोलीले सो ज्ञापन पत्र बुझाएको हो ।
ज्ञापनपत्रमा जिल्लाका सातै स्थानीय तह एंव जिल्लास्थित सरकारी कार्यालयमा भएका भष्ट्राचारमा संम्लग्नलाई कानुनी कारवाही गर्न माग गरिएको छ ।
२०८२ असार ५ गते भष्ट्राचार बिरोधी अभियान उद्घाटन गरेको क्रान्तिकारी कम्युनिस्ट पार्टी नेपाल नवलपरासीले ज्ञापनपत्र बुझाउदै स्थानीय तह र जिल्लास्थित मालपोत कार्यालय,यातायत ब्यवस्था सेवा कार्यालय, नापी कार्यालयलगायत सबै सरकारी कार्यालयमा हुदै आएका भष्ट्राचारजन्य गतिबिधिमा संम्लग्नलाई कडा कानुनी कारवाही गर्न माग गरेको हो ।
सो अवसरमा पार्टीका जिल्ला ईन्चार्ज थापाले कानुनले भष्ट्राचारीलाई कारवाही नगरेकै कारण भष्ट्रहरुको मनोबल बृद्धि भएको बताउदै भन्नुभयो– अब कानुनले भष्ट्रचारीलाई कारवाही नगरे जनताले जनकारवाही गर्छ । जनतलाई हाम्रो साथ रहन्छ ।
ज्ञापनपत्रमा नेपाली भुमि लिपुलेकमा छिमेकी राष्ट्रहरु ईण्डिया र चाइनाले गरेको ब्यापारिक नाका खोल्ने सहमति तत्काल खारेज गर्न माग गरिएको छ । सो पार्टीले सरकारले अतिक्रमणको यो मुद्धालाई अन्तराष्ट्रियकरण गर्न र लिम्पियाधुरा, लिपुलेक र कालापानी क्षेत्रको जमिन फिर्ता लिन भनेको छ ।
उक्त पार्टीले जिल्लाको सुस्तामा भएको भारतीय अक्रिमण हटाउन र सुस्ताका बासिन्दा माथि बिभिन्न बहानामा भारतीय पक्षले लगाएको झुठ्ठा मुद्धा फिर्ता गर्न समेत ज्ञापन पत्रमा प्रधानमन्त्रीलाई ध्यानाकर्षण गराएको छ ।
जिल्ला सेक्रेटरी पाण्डेयद्वारा हस्ताक्षरित ज्ञापन पत्रमा २०८१ साल कार्तिक ६ गते पार्टीले बिभिन्न माग राखेर ज्ञापन पत्र बुझाएको र पार्टीको माग प्रति सम्बन्धित सरोकारवाला गम्भिर नभएको भन्दै ध्यानाकर्षण सहित पुनः ज्ञापन पत्र बुझाइएको उल्लेख गरिएको छ । गतबर्ष सातवटै पालिकामा ज्ञापन पत्र बुझाएको समेत जिल्ला सेक्रेटरी पाण्डेयले जानकारी गराउनुभयो ।
जनता करको चेपुवामा रहेको उल्लेख गर्दै दोहोरो तेहेरो कर नीतिले जनतालाई सास्ती दिएको बेला सवारी साधनमा ईम्बोस्ड नम्बर राख्ने राष्ट्रघाती जनघाती काम तत्काल रोक्न आग्रह गरिएको छ ।
बि.स.२०४६ पछिका उच्च ओहदामा रहेको व्यक्ति तथा जनप्रतिनिधिहरुका सम्पत्ति छानबिन, मिटरब्याज तथा लघुवित्त र बैकिङ पीडितको माग पुरा गर्नुपर्ने, सहकारी ठगीमा संलग्न सबै पहुँचवालाहरुलाई कारवाहीका साथै ,शिक्षा, स्वास्थ्य, रोजगार, कृषि क्षेत्र र विकास निर्माणमा भएका ढिलासुस्तीको अन्त्यको माग ज्ञापन पत्रमा समावेश गरिएको पार्टीले जनाएको छ ।
ज्ञापन पत्र बुझ्दै जिल्ला प्रशासन कार्यालय नवलपरासी(ब.सु.प.)को प्रमुख जिल्ला अधिकारी हिरालाल रेग्मीले जिल्लाको सापेक्षतामा भएका मागहरुलाई आफुले पुरा गर्न प्रयत्न गर्ने र ज्ञापन पत्रलाई प्रधानमन्त्री तथा मन्त्री परिषद्को कार्यालयमा पठाउने प्रतिबद्धता व्यक्त गर्नु भयो ।
ज्ञापन पत्र बुझाउने समयमा सहायक प्रमुख जिल्ला अधिकारी पोषण राज भण्डारी , क्रान्तिकारी कम्युनिस्ट पार्टी नेपालका जिल्ला कार्यालय सदस्यद्वय गणेश बहादुर ढकाल र दुर्गा नारायण चौधरी लगायतको सहभागिता रहेको थियो ।