कृष्ण ढकाल
बर्दघाट,असोज–३१
कुनै पनि सहकारीहरुले आफ्नो ऋण असुलीलाई सहज बनाएर संस्थाको कार्य सम्पादनलाई पार्दशी गर्दछन भने ती संस्थामा कुनै समस्या नरहने नेफ्स्कूनका अध्यक्ष चन्द्रप्रसाद ढकालले बताउनु भएको छ ।
हाम्रो सुपर बचत तथा ऋण सहकारी संस्थाको १५औं वार्षिक साधारण सभालाई शुक्रवार बर्दघाट–२,चिसापानीमा सम्बोधन गर्दै उक्त कुरा बताउनु भएको हो । अध्यक्ष ढकालले सहकारीहरुले राष्ट्रिय सहकारी नियमन प्राधिकरणको मापदण्ड र निर्देशन अनुसार अघिबढेमा स्वतह संस्थामा सुसाशन आउनेमा जोड दिनु भएको थियो । त्यसैगरी संस्थाहरुको अवस्थाका वारेमा जानकारी लिन संस्था परिक्षणका लागि छुटै स्क्यानर प्रविधिको आवश्यकता रहेको ढकालको भनाइ रहेको थियो ।
सोही कार्यक्रममा बोल्दै संस्थाका निवर्तमान अध्यक्ष खेमराज सुवेदीले संस्था क्रमीक रुपले प्रगतिको पथमा रहेको बताउनु भएको थियो भने संस्थाका अध्यक्ष बिष्णुप्रसाद बरालले संस्थालाई सवल तथा निति,विधि र प्रविधिमा अब्बल बनाउने गरी अघि बढी रहेको जानकारी गराउनु भएको थियो ।
संस्थाका अध्यक्ष बिष्णु बरालको अध्यक्षता ,उपाध्यक्ष मनोहर रायमाझीको स्वागत र ब्यवस्थापक विष्णु बहादुर बस्नेतको सञ्चालनमा भएको उक्त वार्षिक साधारण सभामा बर्दघाट वडा नं. ७,जिमिरेभारमा रहेको राष्ट्रिय मा.बि. कक्षा ५ का निरज थारु,वडा नं. १५ पृथ्वीवस्तीमा रहेको आनन्द आधारभूत विद्यालय कक्षा ७ का जगन्नाथ बुढाथोकी र वडा नं. १,मोतीवस्तीमा रहेको बाल्मिकी मा.बी कक्षा ७ का शुभाष पाण्डेलाई कक्षा १२ सम्मको अध्ययन गराउने गरी संस्थाले अभिभावकत्व ग्रहण गरेको संस्थाका अध्यक्ष विष्णु बरालले जानकारी दिनु भएको छ ।
आर्थिक रुपले कमजोर,अपाङ्ग,अनाथ र पिछडिएको वर्गका सदस्य तथा गैर सदस्यहरुका छोरा छोरीहरुको शैक्षिक भविष्यलाई उज्जवल बनाउने उद्धेश्यले संस्थाले प्रत्येक वर्ष ३ जनालाई यसप्रकारको अभिभावकत्व ग्रहण गर्दै आएको संस्थाका ब्यवस्थापक विष्णु बहादुर बस्नेतले बत्ाँउनु भयो ।
बर्दघाट–२,चिसापानीमा केन्द्रिय कार्यालय र पाँच स्थानमा सेवा केन्द्र राखेर ६ हजार ४ सय १३ जना आफ्ना शेयर सदस्यहरुलाई सेवा प्रवाह गरेको हाम्रो सुपर बचत तथा ऋण सहकारी संस्थाको शेयर पुँजी ३ करोड ७८ लाख १३ हजार ९ सय रहेको छ भने बचत रकम ३९ करोड ४५ लाख २२ हजार ६ सय १० रुपैया रहेको छ ।
त्यसैगरी ऋण लगानी तर्फ ३५ करोड,५२ लाख ४५ हजार २३ रुपैया रहेको छ भने जगेडा कोष तर्फ २ करोड ३३ लाख ७ हजार१ सय ७० रुपैया र संस्थाको कुल सम्पती ४८ करोड १३ लाख ७४ हजार ७८ रुपैया रहेको संस्थाले प्रकाशन गरेको वार्षीक प्रतिवेदनमा उल्लेख गरीएको छ ।
बर्दघाट नगरपालिका,रामग्राम नगरपालिका,सरावल गाउँपालिका र प्रतापपुर गाउँपालिकाको सबै वडाहरुलाई आफ्नो कार्यक्षेत्र बनाएर सेवामा समर्पित रहेको हाम्रो सुपर बचत तथा ऋण सहकारी संस्था २०६७ साल माघ २ गते विधिवत रुपमा दर्ता भएर आफ्नो कार्य शुभारम्भ गरेको थियो ।
