परासी, १८ पुस
लुम्बिनी प्रदेश सरकारले निर्माण गरिरहेको खानेपानी, सरफाई तथा स्वच्छता(वास) योजना सम्पन्न गर्न खानेपानी तथा सरसफाई उपभोक्ता महासंघसँग सहकार्य गर्ने भएको छ । प्रदेश भौतिक पूर्वाधार विकास मन्त्रालयले बुटवलमा गरेको वास योजना तयारी सम्बन्धमा प्रदेश खानेपानी तथा सरसफाइ उपभोक्ता महासंघसँगको अन्र्तक्रिया तथा गोष्ठी कार्यक्रममा सहकार्य गरेर वास योजना सम्पन्न गर्ने निर्णय गरिएको हो ।
प्रदेश सरकारले गत आवदेखि वास योजना निर्माण थालेको हो । यसै आवमा सम्पन्न गर्ने लक्ष्य रहेको मन्त्रालयले जनाएको छ । कार्यक्रममा प्रमुख अतिथिको रुपमा बोल्दै भौतिक पूर्वाधार विकासमन्त्री वैजनाथ चौधरीले वास योजना बनेपछि पहुँचको आधारमा नभई आवश्यकताको आधारमा योजना छनौट हुने बताउनुभयो । उहाँले समुदाय स्तरमा सञ्चालित खानेपानी आयोजनाको दीगोपनाका लागि उपभोक्ता समितिको विकल्प नरहेको उल्लेख गर्नुभयो ।
मन्त्रालयका सचिव शुसिल चन्द्र तिवारीको अध्यक्षतामा भएको उक्त कार्यक्रममा सचिव तिवारीले वैज्ञानिक र आधुनिकीकरणको माध्यमबाट नागरिकलाई सुलभ र सहज रुपमा खानेपानीको पहुँच पु¥याउन प्रदेश सरकारले वास योजना बनाएर अघि बढ्न लागेको बताउनुभयो । खानेपानी तथा सरसफाई उपभोक्ता महासंघका राष्ट्रिय अध्यक्ष राजेन्द्र अर्यालले जीवनसँग जोडिएको खानेपानी सबैको पहुँचमा हुनुपर्नेमा जोड दिनुभयो । 
उहांले खानेपानी आयोजनालाई विद्युत महशुसमा सहुलियत दिनुपर्ने, दर्ता नविकरण सहज गराउनुपर्ने माग गर्नुभयो । महासंघका प्रदेश संयोजक थानप्रसाद गैरेले महासंघ र मन्त्रालयबीच सहकार्य हुन सके खानेपानीको विस्तार र पहुँचलाई सर्वसुलभ बनाउन सहज हुने बताउनुभयो । कार्यक्रममा मन्त्रालयका खानेपानी तथा सरसफाई महाशाखा प्रमुख धु्रब धितालले संविधानले मौलिक हकको रुपमा सुनिश्चत गरेको खानेपानीको अधिकारलाई घरघरमा पु¥याउन सरकार लागिरहेको बताउनुभयो ।
वास योजना निर्माणले खानेपानीको हालको अवस्था र आगामी दिनमा गर्नुपर्ने कार्यहरुको बारेमा स्पष्ट दिशाबोध गर्ने उहाँले बताउनुभयो । कार्यक्रममा लुम्बिनी प्रदेशका विभिन्न जिल्लाका अध्यक्षहरुले खानेपानी आयोजना सञ्चालनमा भोग्नुपरेका समस्याहरुको बारेमा ध्यानाकर्षण गराउनुभएको कार्यक्रममा सहभागि खानेपानी तथा सरसफाई उपभोक्ता महासंघ पश्चिम नवलपरासीका अध्यक्ष राजकुमार श्रेष्ठले जानकारी दिनुभयो ।
यसैबीच खानेपानी तथा सरसफाई उपभोक्ता महासंघ लुम्बिनी प्रदेशको बैठक पनि सम्पन्न भएको छ । प्रदेश संयोजक थानप्रसाद गैरेको अध्यक्षता तथा राष्ट्रिय अध्यक्ष अर्यालको प्रमुख आतिथ्यमा भएको बैठकले वास योजना सम्पन्न गर्न सवै जिल्लाले सहयोग गर्ने तथा महासंघको फागुन भित्र स्थानीय तह र जिल्ला अधिवेशन गरिसक्ने निर्णय भएको प्रदेश संयोजक गैरेले बताउनुभयो ।